1Pe 5 | HUI | STEP | I̱niagali ala hene miniwi kogoni howa tí agali ala hene miniwi kamirume mbira bilimulo langero. I̱na i̱ninaga deoreme Keriso ibu tandaga nayagonaga de handarugo mani ibuninaga wá taraore holene ha pani haragola i̱ nde mbira ngulebira. Ani bulebiragonaga i̱na tíhondo bi larogo ogo.

a 5.1Ab 1.8, 1.22, Lm 8.17-18, Mo 1.9

b 5.2Yo 10.11-13, 21.15-17, Ab 20.28, 1 Ko 9.17, 1 Ti 3.3, 3.8, Ta 1.7, 1.11, Pm 14

c 5.3Iba 74.2, 1 Ko 3.9, 2 Ko 1.24, Pb 3.17, 1 Ti 4.12, Ta 2.7

d 5.41 Ko 9.25, 2 Ti 4.8, Hi 13.20, 1 Pi 1.4

e 5.5Min 3.34, Ais 57.15, Eb 5.21, Pb 2.3, Ya 4.6

f 5.6Md 23.12, Lg 14.11, 18.14, Ya 4.10

g 5.7Iba 37.5, 55.22, Md 6.25-30, Pb 4.6

h 5.8Lg 22.31, 1 Te 5.6, Mo 12.12

i 5.9Ab 14.22, Eb 6.11-13, 2 Ti 3.12, Ya 4.7

j 5.102 Ko 4.17, 1 Te 2.12, 2 Te 2.17, 1 Ti 6.12, Hi 13.21, 1 Pi 1.6

k 5.12Ab 15.22, 15.40, 2 Ko 1.19, 1 Te 1.1, Hi 13.22, 2 Pi 1.12

l 5.13Ab 12.12, 12.25, 13.13, 15.37-39, Kl 4.10, 2 Ti 4.11, Pm 24

m 5.14Lm 16.16, 1 Ko 16.20, Eb 6.23

1 Peter 5

Ngode Datagaliwabenaga nogo sibi haru holene mana ogo

1 I̱niagali ala hene miniwi kogoni howa tí agali ala hene miniwi kamirume mbira bilimulo langero. I̱na i̱ninaga deoreme Keriso ibu tandaga nayagonaga de handarugo mani ibuninaga wá taraore holene ha pani haragola i̱ nde mbira ngulebira. Ani bulebiragonaga i̱na tíhondo bi larogo ogo. ^a 2 Tígua nogo sibi Ngode Datagaliwabehanda haru halimulo ngiyago turu howa haru halimu. Manga nahe howa Ngode Datagaliwabehanda hame ledadagua haru halimu. Biabe ogoni bialu howa yolo mule mitangi nabi biamogo bule hame lowa biabe bilimu. ^b 3 Wali agali tígua haru halimulo ngiyago haru howa i̱ haru hagane timbuni kogoni mitangi nabi haru halimu. Ani buwa mana bayale beremilidagua tiguabi bilo haru halimu. ^c 4 Nogo Sibi Haru Hagane Haguane ha pani haragola tígua wá taraore holenenaga emena guaileore wiaabo holene ngiragola yuleberami. ^d

Mo dindi halu holene ngago ogo

5 Ani buwa igiri daliahe kamiru tíbiagali ala hene miniwi karume laradagua bialu halimu. Ani buwa tí bibahendeme tíni mo dindi halu biamogo bigibigi bialu halimu. Irane Anduane Homogonagambugani bi lo ngagome lalu, Ngode Datagaliwabehanda mine haga karu he̱la dai bialu tini mo dindi haga karu ibugua biamogo biaga ka, lalu gilibu nga. ^e 6 Anigo Ngode Datagaliwabehanda bayuwa manda buwa horo pongo bo winingi ibugua tí mo yaraga helo tíni mo dindi howa ibunaga gi hongohe andaneha halimu. ^f 7 Ngode Datagaliwabehanda tí mitangi bu kagonigo tígua mbirale tara tara bibahende mitangi bialu mini tumatuma ho kamigo ibu lamiai halimu. ^g

8 Tí dengala howa mamage ho halimu. Budi ale gabua timbuni laionome mbira bo nole ohowa hai bialu taya ibagabu hagadagua tínaga waitigi dama Heyolabe ibugua ani bialu ka. ^h 9 Anigo tígua Ngode Datagaliwabehondo mini mbiraore hongoho wuwa dama Heyolabe he̱la tagi ho halimu. Keriso hameigini dindi tara tara bibahendeni karume tandaga ogonibi dege nalu kago manda bidami. ⁱ 10 Ngode Datagaliwabe ibu biamogo bia holene bibahendenaga tene kagome tí Kerisoha ho gimbubu howa ibunaga wá taraore haabobo holene mbira ngule olaga ka. Tí tandaga tigi mbira naramigola howa ibugua tí mo baya burugule howa tí ema nabi halimulo mo hongo halu gene napodaganeni helolebira. ^j 11 Ibunaga hongo holene wiaaboboore wilo hamelo ko. Aniore bilo laro.

Bi lamaro bialu lenego ogo

12 I̱na beba nemandi ogoni tíhondo gilibu werogo Kerisoha i̱ hamene mini bilinaheore Sailasa ibugua i̱ biamogo biyagola i̱na tínaga beba gilibu wia harogo. Ngode Datagaliwabenaga biamogo bia holeneore ngago i̱ hendenego tí mo hongo holenaga langerogoni. Ngode Datagaliwabenaga biamogo bia holene ogoniha hongo ho haabo halimu. ^k

13 Ngode Datagaliwabehanda dabo helene Keriso hameigini Babilononi karumebi i̱ igini Maga ibuguabi tíhondo, Tí mitangi bu kama, lalu lawia haragoni. ^l 14 Tí Kerisoha howa tíni gubalini kamigo walia halu gi tigani bilimu.

Tí Kerisonaga kamiru tíha mo palia holene wiaabo helo hamelo kogoni. ^m